കോലഞ്ചേരി: പോലീസിനെ നിയന്ത്രിക്കാന്‍ കഴിയില്ലെങ്കില്‍ ആഭ്യന്തരവകുപ്പ്‌ ഒഴിയാന്‍ മുഖ്യമന്ത്രി തയാറാകണമെന്നു യാക്കോബായ സഭ. പുത്തന്‍കുരിശ്‌ പാത്രിയര്‍ക്കാ സെന്ററില്‍ നടന്ന പത്രസമ്മേളനത്തിലാണു യാക്കോബായ സഭ നിലപാടു വ്യക്‌തമാക്കിയത്‌. പഴന്തോട്ടം പള്ളിയില്‍ യാക്കോബായ വിശ്വാസികളെ പോലീസ് മര്‍ദിച്ചത്‌ ആസൂത്രിതമായിട്ടാണെന്നു വിശ്വാസ സംരക്ഷണ സമിതി പ്രസിഡന്റ്‌ ഏലിയാസ്‌ മോര്‍ അത്താനാസിയോസ്‌ ആരോപിച്ചു.
ഭരണകക്ഷിയുടെ പിന്‍ബലമില്ലാതെ മെത്രാപ്പോലീത്തമാരും സഭാ സെക്രട്ടറിയും ഉള്‍പ്പടെയുള്ളവരെ പോലീസ് മര്‍ദിക്കില്ലായിരുന്നു.
ശ്രേഷ്ഠ ബാവയുടെ മുന്നിലാണു വിശ്വാസികളെ പോലീസ് വേട്ടയാടിയത്‌. ലാത്തിയടിയില്‍ സ്‌ത്രീകളും കുട്ടികളുമടക്കമുള്ളവര്‍ പരുക്കേറ്റ്‌ ആശുപത്രികളില്‍ കഴിയുകയാണ്‌. പോലീസ് മെത്രാന്‍ കക്ഷിയുടെ റോള്‍ ഏറ്റെടുക്കുകയാണ്‌ ചെയ്‌തതെന്നും സര്‍ക്കാരിന്റെ തുടര്‍ന്നുള്ള ഭരണം സഭ ഭയത്തോടെയാണു നോക്കിക്കാണുന്നതെന്നും മോര്‍ അത്താനാസിയോസ്‌ പറഞ്ഞു.
പഴന്തോട്ടം പള്ളിയില്‍ പോലീസ് നടപടിയിലൂടെ ജനഹിതം അട്ടിമറിക്കുകയായിരുന്നുവെന്നും അദ്ദേഹം ചൂണ്ടിക്കാട്ടി. മുഖ്യമന്ത്രിയുടെയും എറണാകുളം ജില്ലയിലെ ഒരു മന്ത്രിയുടെയും ഒത്താശ അക്രമത്തിന്‌ പിന്നിലുണ്ടോയെന്നു സംശയിക്കേണ്ടിയിരിക്കുന്നുവെന്നും മെത്രാപ്പോലീത്ത പറഞ്ഞു.
മാത്യൂസ്‌ മോര്‍ അന്തിമോസ്‌, കമാന്‍ഡര്‍ സി.കെ. ഷാജി, ഫാ. ഷിബു ചെറിയാന്‍, ജോര്‍ജുകുട്ടി ഏബ്രഹാം എന്നിവരും പത്രസമ്മേളനത്തില്‍ പങ്കെടുത്തു.
1 comment:
OUR CM is having two face. he did that with his his team Mr. Antony & Mr. Sudiren also. same policy he is applying for Jacobite and Orthodox also.He is an orthodox,his face he saw sympathies to Jacobite.
Post a Comment