കോതമംഗലം: മാര്‍തോമാ ചെറിയ പള്ളിയില്‍ കബറടങ്ങിയ പരിശുദ്ധ എല്‍ദോ മാര്‍ ബസേലിയോസ് ബാവയുടെ നാമം സ്വീകരിച്ചവരുടെ എല്‍ദോ-ബേസില്‍ പ്രഥമ സംഗമം നടത്തി. പരിശുദ്ധ ബാവയുടെ 327-ാം ഓര്‍മപെരുന്നാളിന്റെ ഭാഗമായാണ് സംഗമം. ഈ പേരുകള്‍ ഔദ്യോഗികമായി സ്വീകരിച്ച കുട്ടികള്‍ മുതല്‍ മുതിര്‍ന്നവര്‍ വരെയുള്ള ജനസഹസ്രങ്ങള്‍ ഇതില്‍ പങ്കാളികളായി. പള്ളിമുറ്റത്ത് പ്രത്യേകം തയ്യാറാക്കിയ പന്തലില്‍ ആയിരക്കണക്കിന് വിശ്വാസികളെ സാക്ഷിനിര്‍ത്തി മന്ത്രി അനൂപ് ജേക്കബ് ഉദ്ഘാടനം നിര്‍വഹിച്ചു.
ഡോ. ഡി. ബാബുപോള്‍ മുഖ്യപ്രഭാഷണം നടത്തി.അഭി.എബ്രഹാം മാര്‍ സേവേറിയോസ് മെത്രാപ്പോലീത്ത അധ്യക്ഷത വഹിച്ചു. അനുഗ്രഹ പ്രഭാഷണവും എല്‍ദോ, ബേസില്‍ എന്നീ നാമധാരികള്‍ക്കുള്ള ഉപഹാര വിതരണ ഉദ്ഘാടനവും അഭി.കുര്യാക്കോസ് മാര്‍ യൗസേബിയോസ് നിര്‍വഹിച്ചു.
ഏലിയാസ് മാര്‍ യൂലിയോസ് മെത്രാപ്പോലീത്ത, ടി.യു. കുരുവിള എംഎല്‍എ, സാജുപോള്‍ എംഎല്‍എ, എല്‍ദോസ് കുന്നപ്പിള്ളി, കെ.പി. ബാബു, ജോര്‍ജ് മാത്യു എന്നിവര്‍ സംസാരിച്ചു. ഫാ. മനു മാത്യു കാരിപ്ര സ്വാഗതവും ഫാ. ജോണ്‍ ജോസഫ് നന്ദിയും പറഞ്ഞു. സംഗമശേഷം പള്ളിയിലെ പ്രത്യേക 12 കൗണ്ടറുകള്‍ വഴി എല്‍ദോ-ബേസില്‍ നാമധാരികള്‍ക്ക് ചെറിയ പള്ളിയുടെ ഫോട്ടോയും സംഗമവും ആലേഖനം ചെയ്ത ഉപഹാരങ്ങള്‍ വിതരണം ചെയ്തു.
No comments:
Post a Comment