കൊച്ചി: കൊലപാതക രാഷ്ട്രീയത്തിനെതിരെ പ്രതികരിക്കുന്ന കാര്യത്തില് സാംസ്കാരിക നായകര് വിധേയന്മാരായിമാറിയെന്ന് ഡോ. ഗീവര്ഗീസ് മാര് കൂറിലോസ് മെത്രാപ്പോലീത്ത. ആസ്ഥാന ഗായകരും കവികളുമായി ചുരുങ്ങിയ സാംസ്കാരിക നായകരില് പ്രതീക്ഷയര്പ്പിക്കുന്നതുകൊണ്ട് പ്രയോജനമില്ലെന്നും മാര് കൂറിലോസ് പറഞ്ഞു.
നവ ജനാധിപത്യ പ്രസ്ഥാനത്തിന്റെ നേതൃത്വത്തില് നടത്തിയ രാഷ്ട്രീയ ഭീകരവാദത്തിനെതിരെയുളള ജനാധിപത്യ സംഗമം ഉദ്ഘാടനം ചെയ്യുകയായിരുന്നു അദ്ദേഹം. മൂല്യങ്ങളോടു പ്രതിബദ്ധത കാട്ടിയ, വെല്ലുവിളികള്ക്കു മുന്നില് അതു ഉയര്ത്തിപ്പിടിച്ച രാഷ്ട്രീയ പ്രവര്ത്തകനെയാണ് കശാപ്പു ചെയ്തിരിക്കുന്നത്. ഫസല്, ശുക്കൂര്, ചന്ദ്രശേഖരന് എന്നിവരെ കൊലപ്പെടുത്തിയതില് സി.പി.എമ്മാണ് പ്രതിക്കൂട്ടില്. മധ്യകാലത്ത് മതങ്ങള് കാണിച്ച അക്രമ വാസനയാണ് ജാതി, മത, വര്ഗ, രാഷ്ട്രീയ കക്ഷികള് ഏറ്റെടുത്ത് നടപ്പാക്കുന്നത്. പ്രത്യയശാസ്ത്ര പ്രതിസന്ധിയാണ് ഇടതുപക്ഷത്തെ ആയുധമെടുപ്പിക്കുന്നത്. സമീപകാലത്ത് ഇടതുപക്ഷത്തിന് ഒരു ജനകീയ സമരത്തിന് നേതൃത്വം നല്കാന് പോലും കഴിഞ്ഞിട്ടില്ല. അഞ്ചു വര്ഷം ഇരുപക്ഷത്തെയും മാറിമാറി പിന്തുണക്കുന്ന രാഷ്ട്രീയം കൈവിട്ട് സാമൂഹിക നീതിയുടെയും പാരിസ്ഥിതിക പക്ഷത്തുമുള്ള പുതിയ രാഷ്ട്രീയം ഉയര്ന്നു വരണമെന്നും ഗീവര്ഗീസ് മാര് കൂറിലോസ് പറഞ്ഞു.
രാഷ്ട്രീയ രംഗത്തോടൊപ്പം സമൂഹവും ക്രിമിനല്വല്ക്കരിക്കുകയാണെന്ന് നവ ജനാധിപത്യ പ്രസ്ഥാനം ജനറല് കണ്വീനര് കെ. കെ. കൊച്ച് അഭിപ്രായപ്പെട്ടു. കണ്ണൂരില് നടന്ന 136 രാഷ്ട്രീയ കൊലപാതകങ്ങളില് 117 പേരും പിന്നാക്ക വിഭാഗമായ തിയ്യ സമുദായത്തില്പെട്ടവരാണ്. 95 ശതമാനം പേരും ദളിത്, പിന്നാക്ക, ന്യൂനപക്ഷ വിഭാഗങ്ങളിലുള്ളവരാണ്. സാമ്പത്തികമായി പിന്നാക്കം നില്ക്കുന്നവരാണ് കൊല്ലപ്പെടുന്നതെന്നും കെ. കെ. കൊച്ച് പറഞ്ഞു. ജനാധിപത്യ സംഗമത്തില് എന്. എം. പിയേഴ്സണ്, സണ്ണി എം. കപിക്കാട്, അഡ്വ. കെ. എസ് മധുസൂദനന്, പി. പി സന്തോഷ്, കെ. സുനില്കുമാര്, ഏകലവ്യന് എന്നിവര് പ്രസംഗിച്ചു.
No comments:
Post a Comment