കോട്ടയം: കേരളത്തില് ഇന്ന് മതത്തിലും രാഷ്ട്രീയത്തിലും അക്രമപ്രവണത കൂടിവരികയാണെന്ന് യാക്കോബായസഭ നിരണം ഭദ്രാസനാധിപന് ഗീവര്ഗീസ് മാര് കൂറിലോസ് മെത്രാപ്പോലീത്ത അഭിപ്രായപ്പെട്ടു. കോട്ടയത്ത് ജനകീയ പ്രതിരോധസമിതിയുടെ ആഭിമുഖ്യത്തില് കൊലപാതകരാഷ്ട്രീയത്തിനെതിരെ നടത്തിയ ജനാധിപത്യസംഗമം ഉദ്ഘാടനം ചെയ്യുകയായിരുന്നു അദ്ദേഹം.
കൊലപാതകങ്ങളില് രാഷ്ട്രീയപാര്ട്ടികളുടെ പങ്കാളിത്തമുണ്ടെന്ന വാര്ത്തകളാണ് പുറത്തു വരുന്നത്. എന്നാല് സാംസ്കാരികനേതാക്കള് പോലും ഇക്കാര്യത്തില് പ്രതികരിക്കുന്നില്ല. മനുഷ്യത്വം നശിക്കുന്ന ജനതയാണ് ഇന്ന് കേരളത്തിലേത്. ആക്രമണങ്ങള്ക്കെതിരെ പ്രതികരിക്കാന് ശേഷിയില്ലാത്തവരായി മലയാളികള് മാറിയതായും മെത്രാപ്പോലീത്ത പറഞ്ഞു. അഹിംസ പഠിപ്പിക്കുന്ന മതങ്ങള്പോലും അക്രമത്തെ പ്രോത്സാഹിപ്പിക്കുന്നു. രാഷ്ട്രീയപാര്ട്ടികള് ഗാന്ധിജിയെ മറക്കുന്നു. കൊലപാതക-അക്രമ രാഷ്ട്രീയത്തിനെതിരെ രാഷ്ട്രീയ-ജാതി-മത വ്യത്യാസങ്ങള്ക്കതീതമായി മനുഷ്യന് ഒരുമിക്കണമെന്ന് ഗീവര്ഗീസ് മാര് കൂറിലോസ് പറഞ്ഞു.
ഡോ. വി.വേണുഗോപാലിന്റെ അധ്യക്ഷതയില് ചേര്ന്ന യോഗത്തില് കെ.ഭാസ്കരന്, റവല്യൂഷണറി ഡി.വൈ.എഫ്.ഐ. സംസ്ഥാന വൈസ് പ്രസിഡന്റ് ഷംനാസ്, അഡ്വ. ജോഷി ജേക്കബ്, ജോര്ജ് മുല്ലക്കര, പി.വി.കൃഷ്ണന്, എ.ശേഖര്, പ്രൊഫ. എന്.ഗോപാലകൃഷ്ണപ്പണിക്കര്, നൗഷാദ് എസ്. മുഹമ്മദ്, മിനി കെ. ഫിലിപ്പ്, ജയ്സണ് ജേക്കബ് എന്നിവര് സംസാരിച്ചു.
No comments:
Post a Comment