യാക്കോബായ സഭയ്ക്ക് നീതി നിഷേധിക്കുന്നു -മെത്രാപ്പോലീത്ത

പിറവം: യാക്കോബായ സഭയ്ക്ക് സര്‍ക്കാര്‍ നീതി നിഷേധിക്കുകയാണെന്ന് അഭി.ഏലിയാസ് മാര്‍ യൂലിയോസ് മെത്രാപ്പോലീത്ത പറഞ്ഞു. സഭയ്‌ക്കെതിരെ നടക്കുന്ന കൈയേറ്റങ്ങളില്‍ പ്രതിഷേധിച്ച് 17ന് പിറവത്ത് റാലിയും പൊതുയോഗവും നടത്തുമെന്നും മെത്രാപ്പോലീത്ത പറഞ്ഞു. പിറവം രാജാധി രാജ സെന്‍റ് മേരീസ്‌ യാക്കോബായ സുറിയാനി കത്തീഡ്രലില്‍ കൂടിയ വിശ്വാസികളുടെയും ഭക്തസംഘടനകളുടെയും യോഗം ഉദ്ഘാടനം ചെയ്യുകയായിരുന്നു അദ്ദേഹം. സഭയ്ക്ക് ഭൂരിപക്ഷമുള്ള പള്ളികളില്‍ മറുപക്ഷം സര്‍ക്കാരിന്റെ മൗനാനുവാദത്തോടെ സംഘര്‍ഷമുണ്ടാക്കുകയാണെന്നും മാമ്മലശ്ശേരി, പിറവം, കുറിഞ്ഞി, വെട്ടിത്തറ, കോലഞ്ചേരി പള്ളികളില്‍ സര്‍ക്കാര്‍ നിഷേധാത്മക നിലപാടാണ് സ്വീകരിച്ചതെന്നും മെത്രാപ്പോലീത്ത പറഞ്ഞു. യോഗത്തില്‍ വികാരി സൈമണ്‍ ചെള്ളിക്കാട്ടില്‍ കോറെപ്പിസ്‌കോപ്പ അദ്ധ്യക്ഷനായി. ഫാ. മാത്യൂസ് മണപ്പാട്ട്, ഫാ. എല്‍ദോസ് കക്കാടന്‍, ഫാ. വര്‍ഗീസ് പനച്ചിയില്‍, ഫാ. ജിബി ഇച്ചിക്കോട്ടില്‍, ഫാ. ജേക്കബ് മാമ്പിള്ളില്‍, ഫാ. ഏലിയാസ് കാപ്പുംകുഴിയില്‍, ഫാ. ഏലിയാസ് തുരുത്തേല്‍, ഫാ. ബിജോ വര്‍ഗീസ്, ഫാ. ജോബിന്‍സ് ഇലഞ്ഞിമറ്റം, ഫാ. ലാല്‍മോന്‍ പട്ടരുമഠം, ഫാ. ഗീവര്‍ഗീസ് തെറ്റാലില്‍, ഫാ. ജെയിംസ് ചാലപ്പുറം എന്നിവര്‍ പ്രസംഗിച്ചു.