തൃപ്പൂണിത്തുറ: അന്ത്യോഖ്യാ സിംഹാസന വിശ്വാസ തീര്‍ത്ഥയാത്രാ സംഘത്തിന്റെ ഓമല്ലൂര്‍ മഞ്ഞനിക്കര തീര്‍ത്ഥയാത്രയ്ക്കുള്ള ഒരുക്കം പൂര്‍ത്തിയായി. മഞ്ഞനിക്കര മാര്‍ ഇഗ്‌നാത്തിയോസ് ദയറായില്‍ കബറടങ്ങിയിരിക്കുന്ന മോറോന്‍ മാര്‍ ഇഗ്‌നാത്തിയോസ് ഏലിയാസ് തൃതീയന്‍ പാത്രിയര്‍ക്കീസ് ബാവായുടെ കബറിങ്കലേയ്ക്കാണ് കാല്‍നടതീര്‍ത്ഥയാത്ര. ആയിരങ്ങള്‍ പങ്കെടുക്കും.
പാത്രിയര്‍ക്ക പതാക ഘോഷയാത്ര തിങ്കളാഴ്ച വൈകിട്ട് 6 ന് തൃപ്പൂണിത്തുറ നടമേല്‍ സെന്‍് മേരീസ് പള്ളിയിലെത്തും. മീനങ്ങാടി സെന്റ് പീറ്റേഴ്‌സ് കത്തീഡ്രലില്‍ കബറടങ്ങിയിരിക്കുന്ന ശാമുവേല്‍ മാര്‍ പീലക്‌സിനോസ് തിരുമേനിയുടെ കബറിങ്കല്‍ നിന്നാരംഭിച്ച പതാക പ്രയാണം മലബാര്‍, തൃശൂര്‍, അങ്കമാലി,കൊച്ചി ഭദ്രാസനങ്ങളിലെ വിവിധ സ്വീകരണം ഏറ്റുവാങ്ങിയാണ് തൃപ്പൂണിത്തുറ നടമേല്‍ പള്ളിയിലെത്തുന്നത്.
തുടര്‍ന്ന് തീര്‍ത്ഥയാത്രാ സംഘത്തോടൊപ്പം മഞ്ഞനിക്കരയിലേക്ക് നീങ്ങും. തൃപ്പൂണിത്തുറ, കരിങ്ങാച്ചിറ, കുറുപ്പംപടി, കോതമംഗലം ആലുവ, കോലഞ്ചേരി, കടാതി, കൂത്താട്ടുകുളം, മണീട്, മുളന്തുരുത്തി, കാഞ്ഞിരമറ്റം ആരക്കുന്നം മേഖലകളില്‍ നിന്ന് തീര്‍ത്ഥയാത്ര ചൊവ്വാഴ്ച രാവിലെ പുറപ്പെടും. വെള്ളിയാഴ്ച വൈകിട്ട് 5 ന് തീര്‍ത്ഥയാത്രാ സംഘം മോറോന്റെ കബറിങ്കല്‍ എത്തും. തുടര്‍ന്ന് രാത്രിയിലെ അഖണ്ഡപ്രാര്‍ത്ഥനയില്‍ പങ്കെടുത്ത് പിറ്റേന്ന് രാവിലെ കുര്‍ബാനയില്‍ പങ്കുകൊണ്ട് കബര്‍ വണങ്ങും. ശ്രേഷ്ഠ കാതോലിക്ക തോമസ് പ്രഥമന്‍ ബാവ, സുന്നഹദോസ് സെക്രട്ടറി ജോസഫ് മാര്‍ ഗ്രിഗോറിയോസ്‌മെത്രാപ്പോലീത്ത, കുര്യാക്കോസ് മാര്‍ ദിയസ്‌ക്കോറസ് മെത്രാപ്പോലീത്ത, ഗീവര്‍ഗീസ് മാര്‍ അത്താനാസിയോസ് മെത്രാപ്പോലീത്ത തുടങ്ങിയ മലങ്കര സഭയിലെ മെത്രാപ്പോലീത്തമാരും വൈദികരും വിവിധ സ്ഥലങ്ങളില്‍ തീര്‍ത്ഥാടകരെ അനുഗ്രഹിച്ച് യാത്രയാക്കും. ഫാ. ജോണി തുരുത്തിയില്‍,ഫാ. ഷിബിന്‍ പോള്‍,ഫാ. രാജു കൊളാപ്പുറത്ത്, സെക്രട്ടറി ജോണ്‍ എം. വര്‍ഗീസ് കണ്‍വീനര്‍ ബിജു കുര്യാക്കോസ്, ഷെവലിയാര്‍ എന്‍.വി. ബേബി എന്നിവര്‍ പത്രസമ്മേളനത്തില്‍ പങ്കെടുത്തു.
No comments:
Post a Comment