കൊച്ചി: ആരാധനാ സ്വാതന്ത്ര്യത്തിനുവേണ്ടി പള്ളിക്കു മുന്നില്‍ 260
ദിവസമായി നടക്കുന്ന പ്രാര്‍ഥനാ യജ്‌ഞം ദേശീയ ശ്രദ്ധ നേടുന്നു. എറണാകുളം
ജില്ലയിലെ മാമലശേരി മോര്‍ മിഖായേല്‍ പള്ളിയിലാണ്‌ ഈ അപൂര്‍വ സമരം
നടക്കുന്നത്‌.
പ്രാര്‍ഥനയും ഉപവാസവും ആരാധനയുമാണ്‌ സമരരീതി. സമരപ്പന്തലില്‍
സ്‌ത്രീകളും കുട്ടികളുമാണു കൂടുതലും. സംഘര്‍ഷമോ പ്രകടനങ്ങളോ
മുദ്രാവാക്യമോ ഹര്‍ത്താലോ ഇല്ലാതെ ജോലിയും ഉറക്കവും ഉപേക്ഷിച്ചുള്ള
പ്രാര്‍ഥനാസമരം!
2012 മെയ്‌ 14ന് വികാരിയുടെ നേതൃത്വത്തില്‍ ആരംഭിച്ച
പ്രാര്‍ഥനായജ്‌ഞത്തില്‍ ശ്രേഷ്ഠ ബസേലിയോസ്‌ തോമസ്‌ പ്രഥമന്‍ കാതോലിക്ക
ബാവയും സഭയിലെ മെത്രാന്മാരും പങ്കെടുത്തുവരുന്നു. ദേശീയ മാധ്യമങ്ങള്‍
സംഭവം വാര്‍ത്തയാക്കിയിട്ടും സംസ്‌ഥാന സര്‍ക്കാരിനോ അധികൃതര്‍ക്കോ
അനക്കമില്ല. വികാരി ഫാ. വര്ഗീസ് പുല്യാട്ടേല്‍ അഞ്ചു ദിവസമായി നിരാഹാര
സമരത്തിലാണ്‌. അദ്ദേഹത്തിന്റെ ആരോഗ്യനില വഷളായി. സര്‍ക്കാര്‍
ഡോക്‌ടര്‍മാര്‍ പരിശോധിച്ചതിനെ തുടര്‍ന്ന്‌ വൈദികനെ അറസ്‌റ്റ് ചെയ്യാന്‍
പോലീസ് തീരുമാനിച്ചെങ്കിലും വിശ്വാസികളുടെയും വൈദികന്റെയും എതിര്‍പ്പിനെ
തുടര്‍ന്ന്‌ നീക്കം ഉപേക്ഷിച്ചു.
യാക്കോബായ സഭയിലെ രണ്ടു വൈദികര്‍ കൂറുമാറി ഓര്‍ത്തഡോക്‌സ് പക്ഷം
ചേര്‍ന്നതാണ്‌ പള്ളിയിലെ പ്രതിസന്ധിക്ക്‌ കാരണം എന്ന്‌ പറയപ്പെടുന്നു.
മേയ്‌ 14ന് പെരുന്നാളിനു ഓര്‍ത്തഡോക്‌സ് വിഭാഗം വൈദിക ട്രസ്‌റ്റി
പള്ളിയില്‍ പ്രവേശിക്കാന്‍ നടത്തിയ ശ്രമമാണ്‌ പുതിയ തര്‍ക്കങ്ങള്‍ക്കു
തുടക്കം. അന്നുണ്ടായ പോലീസ് നടപടിയില്‍ നിരവധി വിശ്വാസികള്ക്ക്
മര്‍ദനമേറ്റു. നിരവധിപേര്‍ ആശുപത്രികളിലായി. ജാമ്യമില്ലാ
വകുപ്പില്‍പ്പെടുത്തി നിരവധിപേരെ അറസ്‌റ്റു ചെയ്‌ത് ജയിലില്‍ അടച്ചു.
പള്ളിയുടെ ഒരു കിലോമീറ്റര്‍ പരിധിയില്‍ പ്രവേശിക്കരുതെന്നും ആഴ്‌ചയില്‍
രണ്ടു ദിവസം സ്‌റ്റേഷനില്‍ ഹാജരായി ഒപ്പിടണമെന്നുമുള്ള ജാമ്യ
വ്യവസ്‌ഥകള്‍വച്ചും വിശ്വാസികളെ പള്ളിയില്‍നിന്ന്‌ അകറ്റി നിര്‍ത്താനും
ശ്രമം നടന്നതായി യാക്കോബായ വിശ്വാസികള്‍ പറയുന്നു.
സഭയിലെ മുഴുവന്‍ മെത്രാന്മാരും തിരുവനന്തപുരത്ത്‌ എത്തി മുഖ്യമന്ത്രി
ഉമ്മന്‍ ചാണ്ടിയെയും അഭ്യന്തരമന്ത്രി തിരുവഞ്ചൂര്‍ രാധാകൃഷ്‌ണനെയും കണ്ട്‌
ചര്‍ച്ച നടത്തിയെങ്കിലും യാതൊരു നീതിയും ലഭിച്ചില്ലെന്ന്‌ സഭാ ഭാരവാഹികള്‍
പറയുന്നു.
ജൂണ്‍ മൂന്നിന്‌ കണ്ടനാട്‌ ഭദ്രാസന യൂത്ത്‌ അസോസിയേഷന്റെ
നേതൃത്വത്തില്‍ നടന്ന വാഹന റാലിക്കു നേരെ പാമ്പാക്കുടയില്‍ ചിലര്‍ കല്ലേറ്‌
നടത്തിയതിനെ തുടര്‍ന്ന്‌ മാമലശേരി പള്ളി ഇടവകാംഗം പുത്തന്‍പുരക്കല്‍
കുര്യാക്കോസ്‌ ജോണ്‍ അപകടത്തില്‍പെടുകയും പിന്നീട്‌ മരിക്കുകയുമുണ്ടായി. ഈ
മരണത്തിന്‌ ഉത്തരവാദികളെ കണ്ടുപിടിക്കണമെന്ന്‌ ആവശ്യപ്പെട്ടു പല സമരങ്ങള്‍
നടത്തിയെങ്കിലും പോലീസ് നടപടി എടുത്തിട്ടില്ല. ഇടവക മെത്രാപോലീത്ത
മാത്യൂസ്‌ മോര്‍ ഈവാനിയോസും മാത്യൂസ്‌ മോര്‍ അന്തിമോസും എല്ലാ ദിവസവും
പന്തലിലെത്തി പ്രാര്‍ഥനയ്‌ക്ക് നേതൃത്വം നല്‍കുന്നുണ്ട്‌.
No comments:
Post a Comment