അജീഷ് മാത്യു ശെമ്മാശ പദവിയിലേക്ക്

ന്യൂയോര്‍ക്ക്: വൈറ്റ് പ്ലെയിന്‍സ് സെന്റ് മേരീസ് യാക്കോബായ സുറിയാനി പള്ളിയിലെ അജീഷ് മാത്യു ശെമ്മാശ പദവിയിലേക്ക് ഉയര്‍ത്തപ്പെട്ടു. ന്യൂയോര്‍ക്കിലെ ന്യൂറോഷല്‍ സ്വദേശിയായ അജീഷ് മാത്യു 2012 ജൂലൈ നാലിന് ബുധനാഴ്ച വൈറ്റ് പ്ലെയിന്‍സ് സെന്റ് മേരീസ് യാക്കോബായ സുറിയാനി പള്ളിയില്‍ വെച്ച് ആകമാന സുറിയാനി സഭയുടെ അമേരിക്കന്‍ അതിഭദ്രാസനാധിപന്‍ യല്‍ദോ മോര്‍ തീത്തോസ് തിരുമേനിയുടെ മേലദ്ധ്യക്ഷതയിലും കോട്ടയം ഭദ്രാസന മെത്രാപ്പോലീത്ത അഭി. തോമസ് മാര്‍ തിമോത്തിയോസ് തിരുമേനിയുടെ സഹകരണത്തിലും വൈദീകവൃത്തിയുടെ പ്രാരംഭ പടവായ ശെമ്മാശ പദവിയിലേക്ക് ഉയര്‍ത്തപ്പെട്ടു.   

യാക്കോബായ സഭയിലെ വന്ദ്യ കോര്‍എപ്പിസ്‌കോപ്പമാരായ വെരി. റവ. ഐസക് പൈലി, വെരി റവ. ഡേവിഡ് ചെറുതോട്ടില്‍, വെരി റവ. ഗീവര്‍ഗീസ് ചട്ടത്തില്‍, കൂടാതെ കേരളത്തില്‍ നിന്നും എത്തിയ റവ.ഫാ ഗീവര്‍ഗീസ് തേക്കാനം, റവ. ഫാ. വിജു ഏബ്രഹാം തുടങ്ങി മറ്റവധി വൈദീകരും ശെമ്മാശന്മാരും ശുശ്രൂഷകളിലും തുടര്‍ന്നുള്ള മീറ്റിംഗിലും പങ്കെടുത്തു. 

കോട്ടയം പള്ളം സെന്റ് ഇഗ്‌നേഷ്യസ് പള്ളിയില്‍ വെച്ച് കണ്ടനാട് ഭദ്രാസനാധിപനും മുന്‍ അമേരിക്കന്‍ ഭദ്രാസന മെത്രാപ്പോലീത്തയുമായ മാര്‍ ഈവാനിയോസ് തിരുമേനിയുടേയും ദിവംഗതനായ റവ.ഫാ. കോശി മത്തായി അച്ചന്റേയും സാന്നിധ്യത്തിലാണ് തന്റെ പതിനൊന്നാം വയസില്‍ ഡീ. അജീഷ് മദ്ബഹ ശുശ്രൂഷകനായി പ്രവേശിക്കപ്പെട്ടത്. പുരോഹിത കുടുംബത്തിലെ അംഗമാണ്. 

അടൂര്‍ ഏഴംകുളം സെന്റ് മേരീസ് വലിയ പള്ളിയുടെ മുന്‍ വികാരിയും പള്ളം സെന്റ് ഇഗ്‌നേഷ്യസ് (കല്ലൂപ്പറമ്പില്‍) പള്ളിയിലെ ദീര്‍ഘകാല വികാരിയുമായിരുന്ന ദിവംഗതനായ റവ. ഫാ. കോശി മത്തായി അച്ചന്റെ (ഏഴംകുളമച്ചന്‍) പേരക്കുട്ടിയാണ് ഡീക്കന്‍ അജീഷ് മാത്യു. കോട്ടയം കല്ലുങ്കത്ര സെന്റ് ജോര്‍ജ് യാക്കോബായ സുറിയാനി പള്ളിയിലെ വികാരിയായിരുന്ന ദിവംഗതനായ വന്ദ്യ കെ.പി.തോമസ് കോര്‍എപ്പിസ്‌കോപ്പയുടെ സഹോദരി ആയിരുന്നു ഡീക്കന്‍ അജീഷിന്റെ മുത്തച്ഛി. 

അമേരിക്കയിലെ മണര്‍കാട് പള്ളി എന്ന് അറിയപ്പെടുന്ന വൈറ്റ് പ്ലെയിന്‍സ് സെന്റ് മേരീസ് യാക്കോബായ സുറിയാനി പള്ളിയിലെ ദീര്‍ഘകാല ഇടവകാംഗങ്ങളാണ് മാതാപിതാക്കളായ കുഞ്ഞുമോന്‍ എ. മാത്യുവും മേരി മാത്യുവും. ആന്‍സി, ആഷ്‌ലി എന്നിവര്‍ സഹോദരിമാരാണ്. 

വൈറ്റ് പ്ലെയിന്‍സ് യാക്കോബായ സുറിയാനി പള്ളി വിശുദ്ധ സഭയ്ക്ക് സമ്മാനിക്കുന്ന ജന്മംകൊണ്ട് അമേരിക്കക്കാരനാണെങ്കിലും മലങ്കര പാരമ്പര്യമുള്ള മൂന്നാമത്തെ ശെമ്മാശനാണ് ഈ അനുഗ്രഹീതന്‍. 

തുടര്‍ന്ന് നടന്ന പൊതുസമ്മേളനത്തില്‍ അഭി. യല്‍ദോ മോര്‍ തീത്തോസ് തിരുമേനി അധ്യക്ഷത വഹിച്ചു. തോമസ് മാര്‍ തിമോത്തിയോസ് തിരുമേനി ആശംസകള്‍ അര്‍പ്പിച്ചു. തുടര്‍ന്ന് ഭദ്രാസനത്തിലെ ബഹുമാനപ്പെട്ട വൈദീകരും ആദ്ധ്യാത്മിക സംഘടനകളെ പ്രതിനിധീകരിച്ച് പി.കെ. ജേക്കബ്, കുഞ്ഞമ്മ ജേക്കബ്, ഷെവലിയാര്‍ ബാബു ജേക്കബ്, ജോറിയ ജോര്‍ജ്, ജിബു വെട്ടിക്കാട്ടില്‍ എന്നിവര്‍ ആശംസകള്‍ നേര്‍ന്നു.