പിറവം: മാമ്മലശ്ശേരി മാര് മീഖായേല് പള്ളിയിലെ യാക്കോബായ ഇടവകാംഗം പുത്തന്പുരയ്ക്കല് കുര്യാക്കോസ് ജോണിന്റെ മരണത്തിനിടയാക്കിയ അപകടത്തില് ദുരൂഹതയുണ്ടെന്ന് യാക്കോബായ സഭ പരാതിപ്പെട്ടു. പള്ളിയില് ആരാധനാ സ്വാതന്ത്ര്യത്തിനു വേണ്ടി യാക്കോബായ സഭ വിശ്വാസികള് പള്ളിക്ക് മുന്നില് അഖണ്ഡപ്രാര്ഥനാ യജ്ഞം തുടങ്ങിയിട്ട് 27ദിവസം പിന്നിട്ടു.അതിനിടെ കഴിഞ്ഞ ഞായറാഴ്ചയാണ് അപകടമുണ്ടായത്.
യാക്കോബായ പക്ഷം നടത്തുന്ന സഹനസമരത്തിന് പിന്തുണ പ്രഖ്യാപിച്ച് യൂത്ത് അസോസിയേഷന് നടത്തിയ ഇരുചക്ര വാഹനറാലി പ്രാര്ഥനാ യജ്ഞപ്പന്തലിലാണ് സമാപിച്ചത്. ഇതുകഴിഞ്ഞ് വീട്ടിലേക്ക് മടങ്ങുകയായിരുന്ന കുര്യാക്കോസ് ജോണിന്റെ ബൈക്ക് വട്ടംതിരിഞ്ഞ് വലതുവശത്തെ വൈദ്യുതി പോസ്റ്റില് ഇടിച്ചാണ് കുര്യാക്കോസ് ജോണിന് ഗുരുതരമായി പരിക്കേറ്റത്. കോലഞ്ചേരി മെഡിക്കല് കോളേജ് ആസ്പത്രിയില് ചികിത്സയിലിരിക്കെ ജൂണ് ആറിനാണ് കുര്യാക്കോസ് ജോണ് മരിച്ചത്.
അപകടം നടന്ന സ്ഥലത്ത് യാക്കോബായക്കാര്ക്ക് നേരെ ഇതിന് മുമ്പ് ആക്രമണമുണ്ടായിട്ടുണ്ടെന്നും അതിനാല് സമഗ്രമായ അന്വേഷണം വേണമെന്നും പ്രാര്ഥനാപ്പന്തലില് കൂടിയ യോഗം ആവശ്യപ്പെട്ടു. ഡോ. മാത്യൂസ് മാര് മെത്രാപ്പോലീത്ത യോഗത്തില് അദ്ധ്യക്ഷനായി. കുര്യാക്കോസ് ജോണിന്റെ മരണത്തെപ്പറ്റി അന്വേഷിക്കണമെന്നാവശ്യപ്പെട്ട് നടത്തുന്ന സമരത്തിന് നേതൃത്വം നല്കാന് യോഗം കര്മസമിതി രൂപവത്കരിച്ചു.
ഭാരവാഹികളായി ഫാ. വര്ഗീസ് പുല്ല്യാട്ടേല് (ചെയര്.), അഡ്വ. വര്ഗീസ് മാത്യു (വൈസ് ചെയര്.), റോബിള് ഫിലിപ്പ് (സെക്ര.), റോയി തോമസ് (ജോ. സെക്ര.) എന്നിവരെ തിരഞ്ഞെടുത്തു.
കര്മസമിതിയുടെ ആഭിമുഖ്യത്തില് പ്രവര്ത്തകര് പിറവത്ത് പ്രകടനം നടത്തി. ഏലിയാസ് മാര് അത്തനാസിയോസ് മെത്രാപ്പോലീത്ത പ്രകടനത്തെ ആശീര്വദിച്ചു.
No comments:
Post a Comment