അങ്കമാലി: യാക്കോബായ സഭ വിദ്യാഭ്യാസ വികസന പരിപാടി നടപ്പാക്കുന്നു. 'വിജ്ഞാന മിത്ര' എന്ന പേരില് നടപ്പാക്കുന്ന പദ്ധതി 12ന് രാവിലെ 9 ന് ഫെഡറല് ബാങ്ക് ഡെപ്യൂട്ടി ജനറല് മാനേജര് ടി.പി. മത്തായി ഉദ്ഘാടനം ചെയ്യും. ചെറിയ വാപ്പാലശ്ശേരി മോര് ഇഗ്നാത്തിയോസ് പള്ളിയില് നടക്കുന്ന യോഗത്തില് ഫാ. ഇട്ടൂപ്പ് ആലുക്കല് അധ്യക്ഷനാകും. ഫിസാറ്റ് എന്ജിനീയറിങ് കോളേജിലെ റിസോഴ്സ് ടീം ആണ് നേതൃത്വം നല്കുന്നത്.
എസ്.എസ്.എല്.സി, പ്ലസ്ടു, ഡിഗ്രി, പ്രൊഫഷണല് കോഴ്സുകള് പഠിക്കുന്ന കുട്ടികളുടെ പഠന നിലവാരം മെച്ചപ്പെടുത്തി ഉന്നതവിജയം നേടാന് പ്രാപ്തരാക്കുകയാണ് വിജ്ഞാനമിത്ര പദ്ധതിയുടെ ലക്ഷ്യം. വൈദികര്, അധ്യാപകര്, മനഃശാസ്ത്രജ്ഞര്, കരിയര് ഗൈഡന്സ് വിദഗ്ദ്ധര് എന്നിവര് ക്ലാസ്സെടുക്കും. പ്രാര്ഥന, ധ്യാനം, കൗണ്സലിങ് എന്നിവയും ഉണ്ടാകും. എല്ലാ മാസവും രണ്ടാം ശനിയാഴ്ചകളില് രാവിലെ 9 മുതല് ഉച്ചയ്ക്ക് ഒന്നുവരെയാണ് ക്ലാസ്സ്.
മെയ്, ആഗസ്ത്, നവംബര്, ഫിബ്രവരി, മാസങ്ങളില് എസ്.എസ്.എല്.സി. കുട്ടികള്ക്കും, ജൂണ്, സപ്തംബര്, ഡിസംബര്, മാര്ച്ച് മാസങ്ങളില് പ്ലസ്ടു വിദ്യാര്ഥികള്ക്കും ജൂലായ്, ഒക്ടോബര്, ജനവരി, ഏപ്രില് മാസങ്ങളില് ഡിഗ്രി, പ്രൊഫഷണല് വിദ്യാര്ഥികള്ക്കും ആണ് ക്ലാസ് സംഘടിപ്പിക്കുക. ഓരോ കുട്ടിയുടെയും പഠനപുരോഗതി മൂന്നുമാസത്തിലൊരിക്കല് വിലയിരുത്തും. തുടര്ന്ന് മാര്ഗനിര്ദേശങ്ങള് നല്കും. അങ്കമാലി മേഖലാ സുവിശേഷ സംഘമാണ് വിജ്ഞാനമിത്ര പദ്ധതി സംഘടിപ്പിച്ചിരിക്കുന്നത്.
No comments:
Post a Comment