സ്വീഡന്‍ യുവജന പ്രസ്‌ഥാന പ്രവര്‍ത്തകര്‍ക്ക്‌ കരിങ്ങാച്ചിറ കത്തീഡ്രലില്‍ സ്വീകരണം നല്‍കി

കൊച്ചി: ആകമാന സുറിയാനി സഭയുടെ സ്വീഡന്‍ ആസ്‌ഥാനമായി പ്രവര്‍ത്തിക്കുന്ന മെല്‍ത്തോ ദായി എന്ന സംഘടനയുടെ പ്രവര്‍ത്തകര്‍ക്ക്‌ കരിങ്ങാച്ചിറ സെന്റ്‌ ജോര്‍ജ്‌ യാക്കോബായ സുറിയാനി കത്തീഡ്രലില്‍ സ്വീകരണം നല്‍കി. തുടര്‍ന്നു സഭയിലെ ഭക്‌തസംഘടനകളുമായി നടത്തിയ ചര്‍ച്ചയില്‍ ഹസാക്കി ആര്‍ച്ച്‌ ബിഷപ്പ്‌ ഒസ്‌താത്തിയോസ്‌ മത്തറോഹം, അഭി.കുര്യാക്കോസ്‌ മോര്‍ ദീയസ്‌കോറോസ്‌, അഭി.ഐസക്‌ മാര്‍ ഒസ്‌താത്തിയോസ്‌, അഭി.മാത്യൂസ്‌ മാര്‍ അന്തീമോസ്‌ എന്നിവര്‍ നേതൃത്വം നല്‍കി. ആരാധനയില്‍ നിന്നും അകന്നുപോകുന്ന യുവജനതയെ തിരികെ കൊണ്ടുവരിക എന്ന ലക്ഷ്യമായി പ്രവര്‍ത്തിക്കുന്ന മെല്‍ത്തോ ദായി എന്ന സംഘടനയുടെ വിവിധ ലക്ഷ്യങ്ങള്‍ മനസിലാക്കാനും മലങ്കര സഭയുടെ ഭക്‌തസംഘടനയായ യൂത്ത്‌ അസോസിയേഷന്റെ പ്രവര്‍ത്തനങ്ങളെക്കുറിച്ച്‌ വിവരിക്കുന്നതിനുമായാണ്‌ ചര്‍ച്ച സംഘടിപ്പിച്ചത്‌. സ്വീഡനില്‍ നിന്നും പതിനൊന്നംഗസംഘമാണ്‌ എത്തിയിരിക്കുന്നത്‌. ഫാ. ഷമ്മി ജോണ്‍, ഫാ. റോയി പോള്‍, ഫാ. വര്‍ഗീസ്‌ പുലയത്ത്‌, ഫാ. ബിജു കൊച്ചുപറമ്പില്‍, ഫാ. സക്കറിയ ഓണേരില്‍, യൂത്ത്‌ അസോസിയേഷന്‍ ജനറല്‍ സെക്രട്ടറി ബിജു സ്‌കറിയ, പി.പി. തങ്കച്ചന്‍, ഷെവലിയാര്‍ സി.എ. വര്‍ഗീസ്‌, മാത്യു കുഴല്‍നാടന്‍, കൊച്ചി ഭദ്രാസന യൂത്ത്‌ സെക്രട്ടറി ബൈജു മാത്താറ,കണ്ടനാട് ഭദ്രാസന യൂത്ത് അസോസിയേഷന്‍ സെക്രട്ടറി സിനോള്‍ വി സാജു  ജോസ്‌ സ്ലീബ, അമ്മിണി മാത്യു തുടങ്ങിയവര്‍ പ്രസംഗിച്ചു.