കൊച്ചി: സഭയുടെ ദേവാലയങ്ങളുടെയും വിശ്വാസികളുടെയും നേരെയുള്ള ഓര്‍ത്തഡോക്‌സ് സഭാ നേതൃത്വത്തിന്റെ കൈയേറ്റ ശ്രമങ്ങള്‍ അവസാനിപ്പിക്കണമെന്നും അതിക്രമം നടത്തിയവര്‍ക്കെതിരേ കര്‍ശനമായ നടപടികള്‍ കൈക്കൊള്ളണമെന്നും കണ്ടനാട്‌ ഭദ്രാസന നേതൃയോഗം സര്‍ക്കാരുകളോട്‌ ആവശ്യപ്പെട്ടു. മാമലശേരിയിലും മണ്ണത്തൂരിലും പോലീസ് അധികാരികള്‍ യാക്കോബായ സഭാ വിശ്വാസികളോട്‌ നീതികാട്ടിയില്ല. കോലഞ്ചേരി പള്ളിയുമായി ബന്ധപ്പെട്ട വിഷയങ്ങളില്‍ ജനാധിപത്യ സംവിധാനത്തിലൂടെ പരിഹാരം കണ്ടെത്തണമെന്നും സഭാ തര്‍ക്കം നിലനില്‍ക്കുന്ന എല്ലായിടത്തും ജനഹിതത്തിനനുസരിച്ച്‌ തീരുമാനങ്ങള്‍ ഉണ്ടാവുകയാണ്‌ വേണ്ടതെന്നും യോഗം വ്യക്‌തമാക്കി. പോലീസ് അധികാരികള്‍ യാക്കോബായ വിശ്വാസികള്‍ക്കെതിരേ അനാവശ്യ കേസുകള്‍ എടുത്ത്‌ പീഡിപ്പിക്കുന്നത്‌ അവസാനിപ്പിക്കണമെന്ന്‌ യോഗത്തില്‍ അധ്യക്ഷത വഹിച്ച മാത്യൂസ്‌ അഭി മാത്യൂസ്‌ മോര്‍ ഇവാനിയോസ്‌ മെത്രാപ്പോലിത്ത ആവശ്യപ്പെട്ടു.
കണ്ടനാട്‌ ഭദ്രാസന ആസ്‌ഥാനമായ മൂവാറ്റുപുഴ അരമന അടക്കം പരി. സഭയുടെ സ്വത്തുക്കള്‍ അനധികൃതമായി കൈവശപ്പെടുത്തിയിരിക്കുന്ന ഓര്‍ത്തഡോക്‌സ് വിഭാഗം അവിടെ നിന്നും ഒഴിഞ്ഞുപോയേ മതിയാവുകയുള്ളൂ എന്നും യോഗം ആവശ്യപ്പെട്ടു. സഭയുടെ ദേവാലയങ്ങളും സ്വത്തുവകകളും അനധികൃതമായി കൈവശംവച്ച്‌ അനുഭവിക്കാമെന്ന ഓര്‍ത്തഡോക്‌സ് സഭയുടെ വ്യാമോഹം ഇനി അനുവദിക്കുകയില്ല.
കണ്ടനാട്‌ ഭദ്രാസനത്തിന്റെ ആഭിമുഖ്യത്തില്‍ 17ന് മൂന്നുമണിക്ക്‌ മൂവാറ്റുപുഴ ടൗണ്‍ഹാളില്‍വച്ച്‌ സമകാലിക വിഷയങ്ങള്‍ സംബന്ധിച്ച്‌ വിശദീകരണയോഗം നടത്തും.കണ്ടനാട്‌ ഭദ്രാസനത്തിലെ എല്ലാ ദേവാലയങ്ങളില്‍ നിന്നും ഉള്ള വിശ്വാസികള്‍ എത്തിച്ചേരുന്നതായ വിശദീകരണയോഗത്തിന്‌ ശ്രേഷ്ഠ കാതോലിക്ക മോര്‍ ബസേലിയോസ്‌ തോമസ്‌ പ്രഥമന്‍ ബാവാ അധ്യക്ഷത വഹിക്കും. യോഗത്തിന്റെ നടത്തിപ്പിന്‌ വിവിധ സബ്‌ കമ്മിറ്റികള്‍ക്കു യോഗം രൂപം നല്‍കി.
No comments:
Post a Comment