മണര്‍കാട്‌ പള്ളിയിലെ വിശുദ്ധ നോമ്പാചരണത്തിനു സെപ്‌റ്റംബര്‍ ഒന്നിനു തുടക്കം

കോട്ടയം: ചരിത്രപ്രസിദ്ധമായ മണര്‍കാട്‌ വിശുദ്ധ മര്‍ത്തമറിയം യാക്കോബായ സുറിയാനി കത്തീഡ്രലിലെ എട്ടുനോമ്പു പെരുന്നാളിനു സെപ്‌റ്റംബര്‍ ഒന്നിനു തുടക്കമാവും. ദൈവമാതാവിന്റെ മധ്യസ്‌ഥത യാചിച്ച്‌ പള്ളിയിലെത്തുന്ന ആയിരക്കണക്കിന്‌ ഭക്‌തര്‍ക്കു ഭജനയിരിക്കുവാനുള്ള സൗകര്യങ്ങളടക്കം എല്ലാവിധ ഒരുക്കങ്ങളും പൂര്‍ത്തിയാക്കിയതായി ഭാരവാഹികള്‍ പത്രസമ്മേളനത്തിലറിയിച്ചു.
സെപ്‌റ്റംബര്‍ ഒന്നിനു വൈകിട്ട്‌ നാലിനു നടക്കുന്ന കൊടിമരം ഉയര്‍ത്തല്‍ ചടങ്ങോടെയാണ്‌ പെരുനാളിനു തുടക്കമാകുന്നത്‌. ഉച്ചകഴിഞ്ഞ്‌ രണ്ടിനു ഇടവകയില്‍ പ്രവര്‍ത്തിക്കുന്ന വിവിധ ആധ്യാത്മിക സംഘടനകളെ ഏകോപിച്ചുള്ള വാര്‍ഷിക പൊതുസമ്മേളനം നടക്കും.
ഇടവക മെത്രാപ്പൊലീത്ത ഡോ.തോമസ്‌ മോര്‍ തീമോത്തിയോസിന്റെ അധ്യക്ഷതയില്‍ കൂടുന്ന സമ്മേളനം ശ്രേഷ്‌ഠ കാതോലിക്ക ബസേലിയോസ്‌ തോമസ്‌ പ്രഥമന്‍ ബാവ ഉദ്‌ഘാടനം ചെയ്യും. മുഖ്യമന്ത്രി ഉമ്മന്‍ചാണ്ടി മുഖ്യപ്രഭാഷണം നടത്തും. കോര്‍ എപ്പിസ്‌ക്കോപ്പാ സ്‌ഥാനം ലഭിച്ച ആന്‍ഡ്രൂസ്‌ കോര്‍ എപ്പിസ്‌ക്കോപ്പാ ചിരവത്തറയെ സമ്മേളനത്തില്‍ ആദരിക്കും. ആറിന്‌ ഉച്ചകഴിഞ്ഞ്‌ രണ്ടിന്‌ കുരിശുപള്ളികളിലേക്കുള്ള റാസ നടക്കും. ഏഴാം തീയതിയാണു പ്രസിദ്ധമായ നടതുറക്കല്‍ ചടങ്ങ്‌.
ഉച്ചനമസ്‌കാര സമയത്താണു നടതുറക്കുന്നത്‌. രാത്രി പത്തിന്‌ പ്രദക്ഷിണവും, കരിമരുന്ന്‌ പ്രയോഗവും നടക്കും. പെരുന്നാള്‍ ദിവസമായ എട്ടിന്‌ ഉച്ചകഴിഞ്ഞ്‌ രണ്ടിനു നടത്തപ്പെടുന്ന പ്രദക്ഷിണത്തോടും, നേര്‍ച്ച വിളമ്പോടും കൂടി ചടങ്ങുകള്‍ സമാപിക്കും.
വികാരി ഇ.ടി.കുര്യാക്കോസ്‌ കോര്‍ എപ്പിസ്‌ക്കോപ്പ ഇട്ട്യാടത്ത്‌, പ്രോഗ്രാം കോ-ഓര്‍ഡിനേറ്റര്‍ ആന്‍ഡ്രൂസ്‌ കോര്‍ എപ്പിസ്‌ക്കോപ്പാ ചിരവത്തറ, ട്രസ്‌റ്റിമാരായ ജോര്‍ജ്‌മാത്യൂ വട്ടമല, ജേക്കബ്‌.ടി. മോസസ്സ്‌ തെങ്ങുംതുരുത്തേല്‍, പ്രിന്‍സ്‌ ഏലിയാസ്‌ പഴയിടത്തുവയലില്‍, സെക്രട്ടറി റെജി. ടി. ഏബ്രഹാം തണ്ടശേരില്‍ എന്നിവര്‍ പത്രസമ്മേളനത്തില്‍ പങ്കെടുത്തു.

മണര്‍കാട്‌പള്ളി പെരുന്നാള്‍: ഭക്ഷണസാധനങ്ങളുടെ വില നിശ്ചയിച്ചു

മണര്‍കാട് സെന്റ് മേരീസ് ദേവാലയത്തിലെ എട്ടുനോമ്പ് തിരുനാളിനോടനുബന്ധിച്ച് മണര്‍കാട്ടും പരിസരപ്രദേശങ്ങളിലുമുള്ള ഹോട്ടലുകളില്‍ സപ്തംബര്‍ ഒന്നു മുതല്‍ എട്ടു വരെ വില്‍ക്കുന്ന ഭക്ഷണസാധനങ്ങളുടെ വില നിശ്ചയിച്ചു. വില ഫാസ്റ്റ്ഫുഡ് സ്ഥാപനങ്ങള്‍ക്കും തട്ടുകടള്‍ക്കും ബാധകമായിരിക്കും. വ്യാപാരികള്‍ വിലവിവരപ്പട്ടിക സ്ഥാപനങ്ങളില്‍ പ്രദര്‍ശിപ്പിക്കണമെന്നും നിശ്ചയിച്ച വിലയില്‍ കൂടുതല്‍ ഈടാക്കുന്നത് ശിക്ഷാര്‍ഹമാണെന്നും ജില്ലാ സപ്ലൈ ഓഫീസര്‍ അറിയിച്ചു. വിലവിവരപ്പട്ടിക ചുവടെ.

ചായ, പൊടിക്കാപ്പി- അഞ്ചു രൂപ, ബ്രൂ കാപ്പി- എട്ടു രൂപ, ഊണ് (വെജിറ്റേറിയന്‍)- 30 രൂപ, പാലപ്പം- അഞ്ചു രൂപ, ഇഡലി, ദോശ- നാലു രൂപ, പൊറോട്ട- അഞ്ചു രൂപ, മസാലദോശ- 20 രൂപ, ചപ്പാത്തി, പരിപ്പുവട, ഉഴുന്നുവട, സുഖിയന്‍- അഞ്ചു രൂപ, വെജിറ്റബിള്‍ കറി- 10 രൂപ, നെയ് റോസ്റ്റ്- 15 രൂപ, കടലക്കറി- 10 രൂപ, മീന്‍കറി- 30 രൂപ, ചിക്കന്‍ ഫ്രൈ (സിംഗിള്‍)- 35 രൂപ, ബീഫ് ഫ്രൈ (ഒരു പ്ലേറ്റ്)- 40 രൂപ, മുട്ടക്കറി- 10 രൂപ, ഓംലേറ്റ് (കോഴി)- 15 രൂപ, ഓംലേറ്റ് (താറാവ്)- 18 രൂപ, മടക്കുസാന്‍, കേക്ക്, ലഡു, അരിവട- 10 രൂപ, ഏത്തക്ക അപ്പം- ഏഴ് രൂപ.
ഊണ് 25 രൂപ നിരക്കില്‍ പള്ളി കാന്റീനില്‍ ലഭിക്കും.