പിറവം: മണീട് സെന്റ് കുര്യാക്കോസ് യാക്കോബായ സുറിയാനി പള്ളിക്ക് കത്തീഡ്രല്‍ പദവി. ബിഷപ്പിന്റെ ആസ്ഥാനത്തെ പള്ളി അമനപള്ളി എന്ന സ്ഥാനമാണ് ഇതോടെ മണീട് പള്ളിക്ക് കൈവരുന്നത്. പരിശുദ്ധ പാത്രിയര്‍ക്കീസ് ബാവ കല്പിച്ച് നല്‍കിയ സ്ഥാനമാനങ്ങള്‍ സംബന്ധിച്ച പ്രഖ്യാപനം ചൊവ്വാഴ്ച വിശുദ്ധ അഞ്ചിന്മേല്‍ കുര്‍ബാനയ്ക്കിടെ ശ്രേഷ്ഠ കാതോലിക്ക ബസേലിയോസ് തോമസ് പ്രഥമന്‍ ബാവ നിര്‍വഹിക്കും. 79-ാമത് മഞ്ഞനിക്കര തീര്‍ത്ഥയാത്ര ചൊവ്വാഴ്ച മണീടില്‍ നിന്നാരംഭിക്കും.
രാവിലെ 8.30ന് ആരംഭിക്കുന്ന കുര്‍ബാനയില്‍ സുന്നഹദോസ് സെക്രട്ടറി ജോസഫ് മാര്‍ ഗ്രിഗോറിയോസ്, ഇടവക മെത്രാപ്പോലീത്ത ഡോ. മാത്യൂസ് മാര്‍ ഈവാനിയോസ്, കൊല്ലം ഭദ്രാസനാധിപന്‍ മാത്യൂസ് മാര്‍ തേവോദോസിയോസ്, അങ്കമാലി സഹായ മെത്രാപ്പോലീത്ത മാത്യൂസ് മാര്‍ അപ്രേം എന്നിവര്‍ സഹകാര്‍മികരാകും.
കത്തീഡ്രല്‍ പദവി പ്രഖ്യാപനത്തെ തുടര്‍ന്ന് ശ്രേഷ്ഠ കാതോലിക്കാ ബാവ കല്പനഫലകം അനാച്ഛാദനം ചെയ്യും.
ഉച്ചയോടെ വടക്കന്‍മേഖലകളില്‍ നിന്നുള്ള തീര്‍ത്ഥയാത്രികര്‍ മണീടിലെത്തിച്ചേരും. തീര്‍ത്ഥാടകര്‍ക്ക് പള്ളിയില്‍ സ്വീകരണമുണ്ട്. കബറിങ്കല്‍ ധൂപപ്രാര്‍ത്ഥനയെ തുടര്‍ന്ന് 2.45ന് ആനമുന്തി കുരിശിങ്കലേക്കുള്ള പ്രദക്ഷിണത്തോടൊപ്പം മഞ്ഞനിക്കര തീര്‍ത്ഥയാത്രയും പ്രയാണമാരംഭിക്കും.
No comments:
Post a Comment