മണീട് പള്ളിയില്‍ പെരുന്നാളിനും മഞ്ഞനിക്കര തീര്‍ത്ഥയാത്രയ്ക്കും കൊടിയേറി

പിറവം: രണ്ടാം മഞ്ഞനിക്കരയെന്നു വിശേഷിപ്പിക്കുന്ന മണീട് സെന്റ് കുര്യാക്കോസ് യാക്കോബായ സുറിയാനി പള്ളിയില്‍ ഏലിയാസ് തൃതീയന്‍ പാത്രിയാര്‍ക്കീസ് ബാവയുടെ 79-ാമത് ഓര്‍മപ്പെരുന്നാളിനും മഞ്ഞനിക്കര തീര്‍ത്ഥയാത്രയ്ക്കും കൊടിയുയര്‍ന്നു. ഡോ.ജോസഫ് മാര്‍ ഗ്രിഗോറിയോസ് മെത്രാപ്പോലീത്ത കുര്‍ബാനയ്ക്ക് കാര്‍മികത്വം നല്‍കി. പള്ളിയില്‍ പുതുതായി സ്ഥാപിച്ച കൊടിമരത്തിന്റെയും കല്‍ക്കുരിശിന്റെയും കൂദാശയും മെത്രാപ്പോലീത്ത നിര്‍വഹിച്ചു. കൂദാശയെത്തുടര്‍ന്നായിരുന്നു കൊടിയേറ്റ്.

ഞായറാഴ്ച രാവിലെ 8.30ന് നടക്കുന്ന മൂന്നിന്മേല്‍ കുര്‍ബാനയ്ക്ക് ഡോ.മാത്യൂസ് മാര്‍ ഈവാനിയോസ് മെത്രാപ്പോലീത്ത കാര്‍മികത്വം നല്‍കും. ഉച്ചതിരിഞ്ഞ് 2ന് കുടുംബയൂണിറ്റുകളുടെ സംയുക്തറാലി, തുടര്‍ന്ന് വൈകിട്ട് 5.30ന് നടക്കുന്ന ഇടവകസംഗമം മെത്രാപ്പോലീത്ത ഉദ്ഘാടനം ചെയ്യും. കോറെപ്പിസ്‌കോപ്പയായി ഉയര്‍ത്തിയ വികാരി ഫാ.സ്ലീബ പോള്‍, ഷെവലിയര്‍ സ്ഥാനം ലഭിച്ച കെ.എസ്.പോള്‍, റെജി കുര്യന്‍ എന്നിവരെ യോഗത്തില്‍ അനുമോദിക്കും. വൈകിട്ട് 7.30ന് ഭക്തസംഘടനകളുടെ സംയുക്ത വാര്‍ഷികം, തുടര്‍ന്ന് നാടകം എന്നിവയുണ്ടാകും.

തിങ്കളാഴ്ച രാവിലെ 8ന് കുര്‍ബാന, വൈകിട്ട് 7ന് പ്രദക്ഷിണം എന്നിവയുണ്ടാകും. സമാപനദിവസമായ ഫിബ്രവരി 8ന് രാവിലെ 8.30ന് നടക്കുന്ന അഞ്ചിന്മേല്‍ കുര്‍ബാനയ്ക്ക് ബസേലിയോസ് തോമസ് പ്രഥമന്‍ കാതോലിക്കാ ബാവ കാര്‍മികത്വം നല്‍കും. പള്ളിയെ കത്തീഡ്രലായി ഉയര്‍ത്തിക്കൊണ്ടുള്ള പ്രഖ്യാപനം കാതോലിക്കാബാവ നിര്‍വഹിക്കും. തുടര്‍ന്ന് 2.45ന് പള്ളിയില്‍ നിന്ന് മഞ്ഞനിക്കര തീര്‍ത്ഥയാത്ര ആരംഭിക്കും.