ഹൈന്ദവ തറവാടായ ചാലാശേരിയിലേക്ക് " അഞ്ചേകാലും കോപ്പും " നല്‍കി.

പിറവം:          പിറവം സെന്‍റ് മേരീസ്‌ യാക്കോബായ സുറിയാനി പള്ളിയിലെ  (പിറവം വലിയ പള്ളി) ശിലാസ്ഥാപന പെരുന്നളിനോടനുബന്ധിച്ചു ഹൈന്ദവ തറവാടായ ചാലാശേരിയിലേക്ക് " അഞ്ചേകാലും കോപ്പും " നല്‍കി. നൂറ്റാണ്ടുകള്‍ക്കു മുന്‍പ് പിറവത്ത് പള്ളി പണിയാന്‍ സ്ഥലം തന്നത് പുരാതന കളരി പരമ്പരയുടെ ഉടമകളായ ചാലാശ്ശേരി തറവാട്ടുകാരായിരുന്നു. കുര്‍ബ്ബാന , പള്ളിക്ക് ചുറ്റുമുള്ള പ്രദക്ഷിണം എന്നിവയെ തുടര്‍ന്ന് പള്ളിയകത്തെക്കുള്ള മുഖ്യകവാടമായ ആനവാതിക്കലില്‍ നടന്ന ചടങ്ങില്‍ വികാരി വന്ദ്യ  സൈമണ്‍  ചെല്ലിക്കാട്ടില്‍ കോര്‍ എപ്പിസ്കോപ്പ  ചാലാശേരിയുടെ പ്രതിനിധിയായെത്തിയ വേണു ഗോപാലിന് "അഞ്ചേകാലും കോപ്പും  " സമ്മാനിച്ചു. സഹ  വികാരിമാരായ ഫാ സ്കറിയ വട്ടക്കാട്ടില്‍, ഫാ റോയ് മാത്യു മേപ്പാടം, ട്രസ്റ്റീ  മത്തായി തെക്കുംമൂട്ടില്‍, സെക്രട്ടറി സന്തോഷ്‌ തളിയിച്ചിറ  എന്നിവരും മാനേജിംഗ്  കമ്മറ്റി അംഗങ്ങളും  വിവിധ  ഭക്ത സംഘടനാ ഭാരവാഹികളും പങ്കെടുത്തു. അഞ്ചേകാല്‍ ഇടങ്ങഴി അരി , ഏത്തക്കുല, ചേന, മത്തങ്ങ, വെള്ളിരിക്ക, വെറ്റില,അടക്ക പുകയില,പപ്പടം എന്നിവ അടങ്ങിയതാണ് "അന്ചെകാലും  കോപ്പും". തുടര്‍ന്ന് നടന്ന സമൂഹ സദ്യയില്‍ ആയിരങ്ങള്‍ പങ്കെടുത്തു.