കോലഞ്ചേരി: നിരന്തരമായ പ്രാര്‍ഥനയിലൂടെ ഈശ്വരന്‍ നമ്മെ ശാക്തീകരിച്ച് മനസ്സ് നവീകരിക്കുമെന്ന് തൃശ്ശൂര്‍ രൂപതാ മെത്രാന്‍ ഡോ. റാഫേല്‍ തട്ടില്‍ ചൂണ്ടിക്കാട്ടി.
പുത്തന്‍കുരിശ് പാത്രിയര്‍ക്കാ സെന്ററില്‍ നടന്നുവരുന്ന 23-ാമത് അഖില മലങ്കര സുവിശേഷയോഗത്തിന്റെ അഞ്ചാം ദിവസത്തെ മുഖ്യപ്രഭാഷണം നടത്തുകയായിരുന്നു അദ്ദേഹം.
മനസ്സ് അസ്വസ്ഥമാകുമ്പോഴും ചഞ്ചലപ്പെടുമ്പോഴും ദൈവത്തെ സ്മരിച്ച് പ്രാര്‍ഥിച്ച് തന്നെ സമര്‍പ്പിക്കുക. ഈശ്വരന്‍ നമ്മെ ശാക്തീകരിക്കുന്നത് അനുഭവിച്ചറിയാനാകും.
യോഗത്തില്‍ ശ്രേഷ്ഠ കാതോലിക്ക ബസ്സേലിയോസ് തോമസ് പ്രഥമന്‍ ബാവ അധ്യക്ഷനായി. ഡോ. മാത്യൂസ് മാര്‍ അന്തീമോസ് മെത്രാപ്പോലീത്ത ആമുഖസന്ദേശവും നല്‍കി. യോഗത്തില്‍ മെത്രാപ്പോലീത്തമാരായ ഏലിയാസ് മാര്‍ അത്തനാസിയോസ്, ഡോ. ജോസഫ് മാര്‍ ഗ്രിഗോറിയോസ്, മാത്യൂസ് മാര്‍ തിമോത്തിയോസ്, ഐസക് മാര്‍ ഒസ്താത്തിയോസ്, എബ്രഹാം മാര്‍ സേവേറിയോസ്, കുര്യാക്കോസ് മാര്‍ യൗസേബിയോസ് എന്നിവരും ജോര്‍ജ് മാന്തോട്ടം കോര്‍ എപ്പിസ്‌കോപ്പ, ജില്ലാ പഞ്ചായത്ത് പ്രസിഡന്റ് എല്‍ദോസ് കുന്നപ്പിള്ളി എന്നിവരും സംബന്ധിച്ചു.
തിങ്കളാഴ്ച വൈകീട്ട് 6ന് ഡോ. മാത്യൂസ് മാര്‍ ഈവാനിയോസ് മെത്രാപ്പോലീത്ത ആമുഖസന്ദേശം നല്‍കും. ഇംഗ്ലണ്ട് ബര്‍ണബാ സമിതി ചെയര്‍മാന്‍ ഡോ. പാട്രിക് കോര്‍ എപ്പിസ്‌കോപ്പ മുഖ്യപ്രഭാഷണം നടത്തും. ശ്രേഷ്ഠ കാതോലിക്ക സമാപന സന്ദേശവും ഡോ. ആല്‍ബര്‍ട്ട് റൗഹ് പുതുവത്സര സന്ദേശവും നല്‍കുന്നതതോടെ സുവിശേഷ മഹായോഗം സമാപിക്കും.
No comments:
Post a Comment