പുത്തന്‍കുരിശ്‌: സെന്റ്‌ അത്തനാസിയോസ്‌ കത്തീഡ്രല്‍ പാത്രിയര്‍ക്കാ സെന്ററില്‍ വെച്ച്‌ റവ.ഫാ.ഡോ. ജോസഫ് സഖറിയാ അച്ചന്‍ കോര്‍എപ്പിസ്‌കോപ്പാ സ്‌ഥാനത്തേക്ക്‌ ഉയര്‍ത്തപ്പെട്ടു.
സെപ്‌റ്റംബര്‍ 17-ന് രാവിലെ 7 മണിക്ക്‌ നടന്ന വിശുദ്ധ കുര്‍ബാന മധ്യേ ശ്രേഷ്ഠ കാതോലിക്കാ ബസേലിയോസ്‌ പ്രഥമന്‍ ബാവായാണ്‌ കോര്‍എപ്പിസ്‌കോപ്പ പദവി നല്‍കിയത്‌. സഭയിലെ മറ്റ്‌ മെത്രാപ്പോലീത്തമാരായ മാര്‍ ജോസഫ് ഗ്രിഗോറിയോസ്‌ (സുന്നഹദോസ്‌ സെക്രട്ടറി), മാര്‍ മാത്യൂസ്‌ ഈവാനിയോസ്‌, മാര്‍ കുര്യാക്കോസ്‌ തെയോഫിലോസ്‌, മാത്യൂസ്‌ മാര്‍ അത്തനേഷ്യസ്‌ എന്നിവരും അനേകം വൈദീകരും കോര്‍എപ്പിസ്‌കോപ്പമാരും സഹകാര്‍മികരായിരുന്നു.
1980-86 കാലയളവില്‍ യുണൈറ്റഡ്‌ തിയോളജിക്കല്‍ സെമിനാരി ബാംഗ്ലൂരില്‍ നിന്നും ബി.ഡി ബിരുദവും, ആഗ്രാ സെന്റ്‌ ജോസഫ് കോളജില്‍ നിന്നും എം.എ ബിരുദാനന്തര ബിരുദവും കരസ്‌ഥമാക്കിയ അച്ചന്‍ 1990- 96 കാലയളവില്‍ കാത്തലിക്‌ ഫാക്കല്‍റ്റി ഓഫ്‌ യൂണിവേഴ്‌സിറ്റി ഓഫ്‌ വിയന്ന (ഓസ്‌ട്രിയ) യില്‍ നിന്നും തിയോളജിയില്‍ ഡോക്‌ടറേറ്റ്‌ നേടി.
കാലംചെയ്‌ത ശ്രേഷ്ഠ കാതോലിക്കാ ബസേലിയോസ്‌ പൗലോസ് രണ്ടാമന്റെ സെക്രട്ടറിയായി സേവനം അനുഷ്‌ഠിച്ചിട്ടുള്ള അച്ചന്‍ ഇപ്പോള്‍ ന്യൂസിലാന്റിലുളള സെന്റ്‌ പീറ്റേഴ്‌സ് യാക്കോബായ സിറിയന്‍ ഓര്‍ത്തഡോക്‌സ് പള്ളിയുടെ സ്‌ഥാപക വികാരിയായി സേവനം അനുഷ്‌ഠിക്കുന്നു. 1988- 89 കാലയളവില്‍ മലേക്കുരിശ്‌ തിയോളജിക്കല്‍ സെമിനാരിയില്‍ ലക്‌ചററായും, മദ്രാസ്‌ ക്രിസ്‌ത്യന്‍ മിഷന്‍ ആശുപത്രിയിലെ സീനിയര്‍ ചാപ്ലെയിന്‍ ആയും, കണ്ടനാട്‌ ഭദ്രാസനത്തിലെ വിവിധ ഇടവകകളിലും സേവനം അനുഷ്‌ഠിച്ചിട്ടുണ്ട്‌.
ബാഹ്യകേരളത്തിലെ ബാംഗ്ലൂര്‍ സെന്റ്‌ മേരീസ്‌ ചര്‍ച്ച്‌, സെന്റ്‌ പീറ്റേഴ്‌സ് ചര്‍ച്ച്‌ ന്യൂഡല്‍ഹി എന്നീ പള്ളികളുടേയും, വെട്ടിക്കല്‍, മുളന്തുരിത്തി തിയോളജിക്കല്‍ സെമിനാരിയുടേയും പ്രാരംഭ ഘട്ടത്തിലെ ഓര്‍ഗനൈസര്‍മാരില്‍ മുഖ്യമായ പങ്കുവഹിച്ചിട്ടുള്ള അച്ചന്‍ വിയന്നയിലെ സെന്റ്‌ മേരീസ്‌ പള്ളി (യൂറോപ്പിലെ ആദ്യത്തെ യാക്കോബായ പള്ളി) കൂടാതെ സ്വിറ്റ്‌സര്‍ലന്റിലും കോണ്‍ഗ്രിഗേഷന്‍ (പള്ളി) സ്‌ഥാപിച്ചു.
ഭാര്യ ലതാ ജോസഫ്, പരേതനായ പടിഞ്ഞാറെക്കുടിയില്‍ റവ.ഫാ. പി.കെ. മാത്തുക്കുട്ടിയച്ചന്റെ മകളാണ്‌. ബിസിനസുകാരനായ ഏകമകന്‍ മോഹിത്‌ കുടുംബ സമേതം കൊച്ചിയില്‍ താമസിക്കുന്നു.
അമേരിക്കയിലുള്ള പോള്‍ പടിഞ്ഞാറേക്കുടിയില്‍ (ഡിട്രോയിറ്റ്‌- മിഷിഗണ്‍), റോയി ആന്‍ഡ്‌ ഗിരി (ഇല്ലിനോയിസ്‌), ജോസഫ് ആന്‍ഡ്‌ നീന (ഇല്ലിനോയിസ്‌), ബിജു ആന്‍ഡ്‌ താര (ഡാളസ്‌) എന്നിവര്‍ അച്ചന്റെ അടുത്ത ബന്ധുക്കളാണ്‌.
No comments:
Post a Comment