കൊച്ചി: കോതമംഗലം മാര്ത്തോമ ചെറിയപള്ളിയില് കബറടങ്ങിയിരിക്കുന്ന പരിശുദ്ധ എല്ദോ മാര് ബസേലിയോസ് ബാവയുടെ നാമധേയമായ എല്ദോ, ബേസില് എന്നീ പേരുകള് ഔദ്യോഗികമായി സ്വീകരിച്ചവരുടെ പ്രഥമസംഗമം 27ന് നടക്കും.
വ്യകതികളെയല്ലാ പരിശുദ്ധന്റെ നാമത്തെ ആദരിക്കുക എന്ന ലക്ഷ്യത്തോടെയാണ് സംഗമം സംഘടിപ്പിച്ചിരിക്കുന്നതെന്ന് പള്ളി വികാരി ഫാ. മനു മാത്യു കാരിപ്രയും ട്രസ്റ്റിമാരും വാര്ത്താ സമ്മേളനത്തില് അറിയിച്ചു. 1685-ല് ബസ്രാവഴി ഒട്ടേറെ ത്യാഗങ്ങള് സഹിച്ചാണ് പരിശുദ്ധന് കോതമംഗലത്ത് എത്തിച്ചേര്ന്നത്. പായ്ക്കപ്പലില് യാത്രചെയ്ത് തലശേരിയില് എത്തി അവിടെ നിന്ന് ശത്രുക്കളില് നിന്ന് രക്ഷനേടാന് വേഷപ്രച്ഛന്നനായി കിഴക്കോട്ട് യാത്ര ചെയ്ത് പാണ്ടി നാടുവഴി പള്ളിവാസലില് എത്തി. തുടര്ന്ന് ഘോരവനത്തിലൂടെ സഞ്ചരിച്ച് കോഴിപ്പിള്ളിയില് എത്തുകയും കാലികളെ മേയ്ച്ചുകൊണ്ടിരുന്ന ചക്കാലനായരുടെ സഹായത്തോടെ കോതമംഗലത്ത് എത്തിച്ചേരുകയും ചെയ്തു. വന്ദ്യവയോധികനായിരുന്ന പരിശുദ്ധന് ഏറെ വൈകാതെ കന്നി 19ന് മൃതിയടയുകയും ചെയ്തു. ഇന്ന് നാനാജാതി മതസ്ഥര് എത്തുന്ന സംസ്ഥാനത്തെ പ്രമുഖ തീര്ഥാടനകേന്ദ്രങ്ങളില് ഒന്നാണ് ബാവ കബറടങ്ങിയിരിക്കുന്ന കോതമംഗലം ചെറിയപള്ളി.
പരിശുദ്ധ ബാവയുടെ 327-ാം ഓര്മപെരുനാളിനോട് അനുബന്ധിച്ചാണ് പ്രഥമ എല്ദോ, ബേസില് സംഗമം സംഘടിപ്പിച്ചിരിക്കുന്നതെന്നും ഇവര് പറഞ്ഞു. ഇതിനകം ഈ നാമധേയമുള്ള പതിനായിരത്തോളം പേര് സംഗമത്തില് പങ്കെടുക്കാന് പേര് രജിസ്റ്റര് ചെയ്തു. ബാവയുടെ നാമധേയം ഔദ്യോഗികമായി സ്വീകരിച്ചിട്ടുള്ളവര്ക്ക് മാത്രമേ രജിസ്ട്രേഷന് അനുവദിക്കൂ. 27 വരെ രജിസ്ട്രേഷന് അവസരം ലഭിക്കും. മാമോദീസ സമയത്ത് ബാവയുടെ നാമധേയം സ്വീകരിച്ചിട്ടുള്ളവര്ക്ക് സംഗമത്തില് പങ്കെടുക്കാന് കഴിയില്ല. ഇത്തരത്തില് ലക്ഷക്കണക്കിന് ആളുകള് ഉണ്ടായിരുന്നതിനാലാണ് ഔദ്യോകിക നാമധാരികള്ക്ക് മാത്രം അവസരം നല്കിയിരിക്കുന്നതെന്നും ഇവര് വ്യക്തമാക്കി.
ഉച്ചക്കഴിഞ്ഞ് 2ന് നടക്കുന്ന സംഗമത്തില് ശ്രേഷ്ഠ കാതോലിക്ക മാര് ബസേലിയോസ് തോമസ് പ്രഥമന് ബാവ അധ്യക്ഷനായിരിക്കും. മന്ത്രി അനൂപ് ജേക്കബ് ഉദ്ഘാടനം ചെയ്യും. രാഷ്ട്രീയ, സാമുദായിക, സാംസ്കാരിക നേതാക്കള് സംബന്ധിക്കും. അഡ്വ. ഷിബു കുര്യാക്കോസ്, പി.വി പൗലോസ്, എബി വര്ഗീസ്, ബിനോയ്ദാസ് എന്നിവരും പത്രസമ്മേളനത്തില് പങ്കെടുത്തു.
No comments:
Post a Comment