പിറവം: പിറവം വലിയപള്ളി കത്തീഡ്രലായി പ്രഖ്യാപിക്കുന്ന ചടങ്ങിന് പിറവത്ത് ഒരുക്കങ്ങളായി. ആകമാന സുറിയാനി സഭയുടെ പരമാദ്ധ്യക്ഷന് പരിശുദ്ധ ഇഗ്നാത്തിയോസ് സഖാ പ്രഥമന് പാത്രിയര്ക്കീസ് ബാവയാണ് പിറവത്തെ പുരാതന ദേവാലയമായ സെന്റ് മേരീസ് യാക്കോബായ സുറിയാനി പള്ളിയെ സഭയുടെ കത്തീഡ്രല് പള്ളിയായി ഉയര്ത്തിയത്.
കത്തീഡ്രല് പദവി സംബന്ധിച്ച ഔദ്യോഗിക പ്രഖ്യാപനം 14ന് പിറവം വലിയപള്ളിയില് നടക്കും. വലിയപള്ളി മൈതാനിയില് പ്രത്യേകം തയ്യാറാക്കുന്ന മദ്ബഹയില് ശനിയാഴ്ച രാവിലെ 8ന് ഏഴിന്മേല് കുര്ബാന നടക്കും. ശ്രേഷ്ഠ കാതോലിക്ക ബസേലിയോസ് തോമസ് പ്രഥമന് ബാവ കാര്മികത്വം വഹിക്കും. കുര്ബാനയില് ബാവയും ആറ് മെത്രാപ്പോലീത്തമാരും പങ്കെടുക്കും . 9.30നാണ് കത്തീഡ്രല് പ്രഖ്യാപനം. പൊതുസമ്മേളനം ശ്രേഷ്ഠ കാതോലിക്കാ ബാവ ഉദ്ഘാടനം ചെയ്യും. ഡോ. മാത്യൂസ് മാര് ഈവാനിയോസ് മെത്രാപ്പോലീത്ത അദ്ധ്യക്ഷനാകും. ഡോ. ജോസഫ് മാര് ഗ്രിഗോറിയോസ് മെത്രാപ്പോലീത്ത അനുഗ്രഹപ്രഭാഷണം നടത്തും.
കത്തീഡ്രല് പ്രഖ്യാപനത്തിനും ഏഴിന്മേല് കുര്ബാനയ്ക്കും വലിയപള്ളിയില് എല്ലാ ഒരുക്കങ്ങളും പൂര്ത്തിയായതായി വികാരി സൈമണ് ചെല്ലിക്കാട്ടില് കോര് എപ്പിസ്കോപ്പയും ട്രസ്റ്റി മത്തായി തേക്കുംമൂട്ടിലും അറിയിച്ചു.
No comments:
Post a Comment